الإنطباع الأول

لو جيت تقارن بين نفسك الحالية وبين نفسك قبل خمس او عشر سنين بتلاحظ اختلاف كبير والمقصود بالاختلاف ليس الجسمي او الشكلي لان ذا مفروغ منه بل اقصد فيه الاختلاف الداخلي و الاخلاقي .
مثلاً : في سابق عهدك كنت شخص غير مبالي مو حق مسؤلية لكن بالوقت الحاضر انت شخص ينعمد عليك وموثوق فيه .
مثل هذه التغيرات لاتحدث بين يوم و ليله لانها من اكثر التغيرات الي تأخذ وقت والسبب وراء انها تاخذ وقت فيما توضح : اولاً صعب جداً ان الشخص يغير في تصرفاته وعاداته لانه اعتاد عليها الى جانب هذا التصرف ماسلكته وإتبعته إلا لأنك مقتنع فيه ، ثانياً :  ان الناس تأخذ بالانطباع الأول فمتى ماكنت شخص مستهتر راح ينطبع في مخيلتهم انك شخص مستهتر مهما حاولت وجاهدت في تغير الصورة  وحتى لو تغيرت راح يأخذ منهم دبل الوقت الي قعدت تحاول فيه تغير عادة من عاداتك .
لذا دائم نحط ببالنا اهمية الانطباع الأول " الصورة الأصلية " فهي الصورة الي راح تلاحقك للقبر ..!
اذا داومت بمكان جديد عط صورة الشخص المسؤل الرائع و المثالي وصدقني  بتسلك جميع امورك قدام ، بالمحاضرة حاولوا اول ثلاث محاضرات تجلسون قدام وتشاركون وراح تبقى صورة الشخص الشاطر مصحوبه معك .
لاحظوا احيان شخص كانت شخصيته حلوة من النوع المسؤل لو غير ذا السلوك وش بيقولون الناس ..!
بيقلون يمكن صاير معه شيء ، لا نمسك عالزله ولا على المرة ..!
حتى لو صار كذا لين يموت بتحط له الناس الف عذر وعذر ليش ..؟ لأنه شخص لعبها صح و ترك له انطباع جيد عند الناس .
هذي طبيعة البشر واكبر عيوبنا نهتم بالسلوك الأولي للأشخاص ونرفقه معهم مهما حاولوا مخالفة هذي الصورة ..!
نلاحظ احيان نحاول ونجاهد اننا نوضح الاختلاف الي صار فينا لكن " كأنك يا زيد ما غزيت " يعني شخصيتك من النوع الي ما تحب تقدم تضحيات وش ما كانت لكن تغيرت وصرت تحاول تضحي بوقتك عشان تساعد فلان وصرت تحاول تقلل من اشغال فلان من الناس وانت ملاحظ ذا الشيء لكن صدف ان فلان ذا طلبك طلب وانت مايمديك ابد تنفذ له هالطلب .. اش راح يصير ..؟
على طول راح يقول : اصلن انت عمرك ماسويت لي شيء / اصلن متوقع انك بتقول كذا / انت ماعمرك فضلت احد على نفسك / وش برجي منك اصلن .....الخ
في ذي اللحظه تحس ان كل جهودك ضاعت زي الي ذاكر طول الترم واخر شي يجي الدكتور ويقول الكل راسب لاتحاولون .
في انفسنا نتسأل انا تغيرت انا حاولت وانا ضحيت ليش ما ينذكر الا الشين مني ..؟  وارجع اقول لان بداياتنا كانت سيئة وصورتنا اتخذت ذا الشكل .
لاننا غالبيتنا مانهتم ومو مقدرين اهمية الانطباع الأول ، وحنا صغار محد حاول يفهمنا اهمية سلوكنا وش عايدة علينا لاحقاً
ينصحونا انا نُحسن التصرف بس عشان ذا عيب ذا مو صح .
محد كلف حالة بتفهيمنا ذا المنطق المهم الي غالبنا فهمه وادركه عن طريق التجربة ، فقط نعرف حرام وحلال .
ولاحد يجي يقول " بالطقاق " و " ماعلي من احد اهم شيء نفسي " لأن بطبيعه الإنسان انه يكون بمجتمع وإذا ذا المجتمع نبذني وعشت لحالي بين جوال ولاب وانقصر مجتمعي عليها ماصارت حياة ..!
حلو ان مجتمعك يفهمك ويرسم لك صورة جميله تشبهك مو صورة تخالفك من كل المحاور صورة هي النقيض منك .
كلنا نحس بالسعادة اذا احد قال انت شخص مسؤل انت شخص متفهم انت شخص مراعي وكانت ذي الصفات فينا نحس ان الي حولنا فاهمينا وان الايام الي عشناها معهم ما كانت مجرد وقت وانقضى وقت بدون أي فائدة  .

                                                            " هاي keek "

لدى الجميع نظرة ومعرفة تامة بثقافة : الكيك .
وهي بكل احترام ثقافة اخذت اكبر من حجمها وبكثير ومن اسخف ما رأيت بحياتي ..!
هي بنظري مثل البالون منفوخ وش كبرة وهو مغير هوى....!
بصراحة هو برنامج اقدر اقول سقيم لا منه فايدة ولا يبهج الصدر هو اشبه ببرنامج يكشف الشخصيات ، يعني لو جينا للمقاطع
كلها تدور حول موضوع سخيف ، او نكته ممرضة ، او نصيحة سقيمة من شخص ماطبقها ، او سماجة تكاد ان تقتلك .
لاحد يجي يقول البعض ينصح ومحترم ومايتسيمج لأن الي بينصح يقدر ينصح بألف طريقة غير ال(38) ثانية ذي ..!
يعني عشان تستوفي النصيحه شروطها لا بد من توفر الوقت الكافي عشان المتلقي يستوعب ..
مو ذا المقطع الي من بديت وقلت بسم الله إلا انتهى ..!
عموماً من وجهة نظري اتمنى ينحذف هالبرنامج ..ليه: لأن الناس استخفت واصحاب العقول ماعد فيه " بح "
 قبل يومين اتكلم مع وحدة من صديقاتي اقولها بشترط قبل النظرة الشرعية يعطيني حسابة الي " بالكيك " وليت يصير ذا عُرف عندنا تجنباً للإرتباط بمثل من نرى .
يعني صراحة تميلح مامنه فود غير عرض وجيه ويعننى اغنياء ..!
صراحة انقد الرجُل الي ينزل مقاطع له وش ما كانت سواءاً  مفيدة او غيره ، لأن فيه الف طريقة اذا بتنصح ، والي مقاطعه كلها صياح وهاي وباي ذا اصلن انغسل مخه وماعاد فيه فود .
المشكله بعضهم يجيك يتسيمج ويتريق على الي اسمج منه والي اسمج منهم يتريق عليهم ..!
يابوي انت وياه كلكم سخيفين فرجاء اتحفونا بسكوتكم ...!
وعاد كله كوم والبنات كوم ثاني ، الله واكبر جد الله واكبر ، يعني وش وضعك يوم تنزلين اسبوع عين والي بعده فم ثم الي بعدة الخشم ..!
يعني تبين الاسبوع الاخير نجمعها ونكتشف ما كان خلف الستار تلعبين الصور المتقطعه انتي ..؟
الي اهلها سامحين لها تكشف ذي الله يهديها هي واهلها مالنا بها بس الي اهلها مادروا عن تقطيعها ذا ..؟
 غير ان البنات للأمانه فاقن الشباب سماجه ..!
طول المقطع تصور عينها بالله وش تبين ، او طول الوقت ترقص رقص الله العالم به ، وكله في كفة والي تنتقد غيرها في كفة ثانيه ..!
يعني بالله لاتنتقدين وانتي مطلعه وجهك او عينك او حتى صوتك ، يعني الغالبية العظمى اهلهم ما يدرون عن الي تسويه ..!
اما الي اهلها دارين فذولي حاله خاصة اتجنب الحديث عنهم لأن ذا يقولونله حرية شحيصة ..!
قصر الكلام ايها القوم ترى كل مالكم من حضيض لحضيض ، وترى فشلتونا انت وياه الله ياخذ من علمكم عليه وترى مو عشانك حلو يعني ذا بيغفر لك سماجتك .
الطامه الكبرى بالموضوع التعزيزات الي تجي من البنات خصوصاً للمقاطع ، حسبي الله على الشيطان يعني بالله عشان الي بالمقطع بخدة غمازة خقيتي وحطيتي لايك وصار مقطعه هادف ..!
ولا الي يضحكون ويعززون لهم ويقولون جد المقطع رهيب وينتشر بالواتتس والبلاك والتويتر وكل مكان كأنه قال اعظم نكته بالتاريخ ويجيك تحت المقطع الف سطر ضحكه ...!
يعني انا بعرف لذي الدرجه صرنا تافهين نضحك على مقاطع الله المستعان .
ما انكر ان فيه منها الي تضحك بس الغالبيه العظمى وبنسبة 95% تافهه سامجه وتجيب الهم للرايق .
الطامه الكبرى الثانيه داوود الشريان يوم استضافهم وعزز لهم ..!
مرة خلصت المواضيع مالقيت الا ذولي بدل مانقمع ذي الظاهره نزيد من إنتشارها ..!
يعني بعرف بدر آل زيدان وش عنده من فايدة كله استعراض وكلام فارغ ومُعاد ، ما اقول غير الشرهه مو عليه على البنات الي خقن وعلى داوود الشريان الي عطاه جوه ..
اما فيحان ....!
ضاعت العبارات من عقلي يعني جد لاتعليق عالسماجه وللأسف عطوه جوة وبقوة .
وغيرهم باللستة كثير .
اتمنى ان ها لبرنامج  ينحذف وماعاد يطراله طاري وياليت تخففون من تنزيل المقاطع ترى البرنامج يشتكي .!

                                                     مبالغات ......؟

( اتمنى اكون شخص مثل امي / اتنمى اتزوج رجال مثل ابوي )

احس احيان نبالغ في كلامنا عشان نثبت محبتنا يعني صحيح امي بعيني احسن ام وابوي ربي لا يحرمني منه افضل رجل لكن مو معناه اني بكون مثل امي وابي رجال مثل ابوي ...
مو من الحب ذا ذي مبالغه  يعني للأمانه بكذا انا اظلم حياتي واحكم عليها بالتكرار ، يعني فرضاً لنسرح بخيالنا شوي ونقول ان به عمرين لك تقدر تعيشها هل راح تكرر نفس الي عشته بأحد العمرين مرة ثانيه ...؟
ورجاء الرومنسيه المفرطه مانبيها ترى سماجة تقول أي بعيد نفس الي عشتة مع الشخص الي حبيته الف مرة ...؟
حرام فيهم عمر ثاني صراحة ، المهم مالنا بالعشاق راح اعطيهم حقهم من المدونه .
للامانه هل امك كامله وابوك رائع لدرجة تبين زوجك زيه ..؟ خلوا المحبة على جنب وخلوا انهم احسن اب وام على الكرة لكن لو جينا للواقع مافي احد كامل خالي من العيوب .
احيان امك تعتقد انك مو فاهمه الحياة وان نظرتك للحياة خطأ ومبدأك قريب من الفاشل وذا ناتج عن الحياة الي مرت بها في حين انك بقرارة نفسك عارفة انه هي مبدأها شوي لك عليه .
احيان ابوك يتدخل في منحنى ومنعطف مهم بحياتك فقط عشانه يشوف انك جاهل في الحياه .. هل ذا الشيء ودكم تعيشونه عيالكم او ان زوجك ودك انه يكون كذا ....؟
ولاحد يقول امي مو كذا ابوي غير حتى انا ابوي غير وامي وش حلاتها بس الحق حق والحب حب ومااخلط ذا مع ذا ابد ماتمتزج
وان كان العيب ذا مو فيهم اكيد فيهم غيره واذا جاء احد وقال لا هذا يدل على انه يثبت إن في كمال في ذي الدنيا فيخالف العقل ويخالف " الكمال لله تعالى " .
عني اتمنى شخص يقارب بعض صفات ابوي لكن لا يطابقه ابي اعيش حياة  تختلف وابي اكون فلسفة تخصني مو مقتبسة من تجارب امي واعتقاداتها .
امي عاشت حياتها كونت فلسفتها جربت وانصفقت من الدنيا انا بعد بنصفق وابي اعيش .
 

                                      

                                  سيطرة العادات

مما لا يختلف عليه اثنان هو سريان العادات في مجتمعنا هذا بشكل لا يصدق ، مفهوم ( العيب ) صار اقوى صدى واكثر تطبيقا عن مفهوم الحكم الشرعي .
مثلاً : نقول لشخص قوم صل يقول شوي بكمل النومة تقول حرام خاف الله يقولك الله غفور رحيم ..؟
وتجد نفس الشخص : فلان انا بدخل كليه الطب يقول لا عيب وش بيقولون عنا الناس ادخلي رياضيات ولا أي قسم ماعندنا بنات يدخلون طب ..؟
الله غفور رحيم بس الناس لا فوق الحكم وحكمهم فوق الشرع .. جد لا اجد العبارات الي تعبر عن سخافة بعض العقول وسخافة معظم الأعراف السائدة .
لماذا يضيع مستقبل شخص فقط لانه مو متعارف عليه بالمجتمع الصغير الذي لايكاد ان تراه العين المجردة بالخارطة بل لايُرى من الفضاء الخارجي ، تُحاج الاشخاص بالادله الشرعية وانهُ لايوجد دليل شرعي يحرم هذا الا انهم لايفقهون حديثا هم كالأنعام بل اهم اضل .
الادهى والأمر من ذلك ان الذين يقولون بالعادة والعرف هم اكثر المخالفين لها ..؟
بصراحة صرنا في زمان كثرة فيه الانفتاحات صار القديم لا يؤخذ به لكن هناك من يبرر لنفسه منعك من أي امر بحجة العادة وهو في نفسة يخبئ السوء او فقط هكذا لا يرد منك ان تفعل شيء او لانه لا يرد ان يكلف نفسه عناء مشوار إضافي على مشاويرة  .

احدى معارفي جاتها وظيفة بمكان يبعد 70 كيلوا عن سكنها وكلنا نعرف ان الوظيفة ماتجي الا بعد شق الانفس في ذا الزمان لكن اخوها رفض بحجة انه ماعندانا بنات يركبون مع سواويق ...؟ طيب اخوي الفاضل ممكن توديني قال لا عندي مشاوير و " البنت مالها الا بيتها وبيت رجالها " الله على العذر الي اقبح من ذنب ..!
ممكن كثير ماعندهم مشكله من ناحية العادات لكن المجتمع الي اعرفه به الملاين التي تضاعف الكثير ممن تسبب لهم العادة حاجز لا يهده الزمن .
ممكن البعض يقول لا انا ما اعمل بالعادات وكذا،  لكن فقط كلام لكي لا ينتقدة المجتمع يخجل من المجتمع ولا يخجل من نفسة .

                                                

                                               نهاية أم هي بداية ..!

اليوم هو اليوم الثالث على تخرجي من الجامعة " ومبروك لي والفال للباقين " .
كنت دايم اتمنى اتخرج نظراً اني دخلت لأسوء جامعه بالإضافة لدخولي لقسم ماكان لي رغبة فيه ، وجاء ذا اليوم ومثل ماتوقعت ماكنت مثل الغالبية العظمى الي تحزن على فراق من تحب لأن في شيء اسمه جوال صحيح  حزنت بس مو معناته تدمرت ،
نلاحظ بعض البنات ودها طول عمرها تجلس بالجامعه ولا ودها تتخرج ودها تتزوج وتجيب العايلة كامله بالجامعه وكأن الجامعة هي افضل مكان على وجه الارض استعجب من هذي الشخصيات جدا..!
كنت محتارة عن ردة فعلي بعد التخرج هل بكون عاطله باطلة واسمن واتدمر لأن ماعاد في طلعه من البيت او اني بستانس وابدأ اقوي واوطد علاقتي بزميلاتي وزميلات زميلاتي .
الجميل بردة فعلي اني كأني ملكة العالم حسيت براحة ابد ما تنشرى  الى جانب اني من ثالث يوم ابتديت انشئ مشروعي المؤجل من خمس سنوات الا وهو ذي المدونه .
يعني شيء جميل اني بديت  بذي السرعه تنفيذ مهامي المؤجله ولا افكر بعد اخذ دورة اطور بها نفسي ، بصراحه شيء مو متوقع من شخصي الغريب اني اخذت الموضوع وكأنه اعظم واحلى حاجة صارت لي من زمان لأن بالواقع انك تكون شخص فاضي حاجة جد مو حلوة وتؤدي الى الكثير من المشاكل العاطفية والنفسية والعائلية لأن الفاضي مثل مايقول المثل " يعمل قاضي " فيصير يتدخل بكل شيء كل طلعه يحشر نفسه فيها ويظلم الي يدرسون بحجة انه هو بالبيت ما يخرج ( يقالك الجامعه خرجه ) اكره الي يحط ان الجامعه متنفس وتحل محل الخرجه يعني عشان فيها كوفي وبها كم شجرة صارت واو خرجه . إلى جانب ان الشخص العاطل يحس بالظلم لأتفه الامور .
اخر يوم وحدة من البنات قالت بدا المشوار وتعجب منها الكل  وقالوا أي بدايه خلاص انتهينا حليني متى تتوظفين ، فقالت : الدراسه ماعمرها كانت نهايتها نهاية مشوار انا انهيت مشوار الدراسه وببتدي بمشوار الله اعلمبه ..؟
انا اوفقها الرأي وممكن يكون ذا الكلام تقليدي لكن صراحة الكل بعد الجامعه واقصد بالكل البنات يعتبرون انهم خلاص انتهت صلاحيتهم وبتنشغل بالبيت وكذا ...
صحيح اننا بننشغل بالبيت بس مو معناته ماكان عندي الا الدرسة وما يمكن يحل بدالها شيء .
انا ببدأ بمشواري مع المدونه ، غيري بيبدا دورات والبقية بيجلس باليت ويبدا حششششش بالخلق ..!
عموما وجهة نظري تقول " لا اوقف حياتي على فقدان شيء " واقصد بالشيء ليس فقط الجامعه بل أي حاجة تعودناها مثل الي تزوجت اذا تطلقت انتهت حياتها توقفت حياتها على الزواج والي تعودت على الفلته مو تدمر حياتها اذا صادفت زوج شديد وماتقدر تتعامل معه والي تعودت على المصروف اذا انقطع لأي ضرف مو تنتهي حياتها  والي وإلي ...إلخ
معروف بالحياة قاعده تعلمناها منذو الصغر مافي شيء اسمه للأبد الحياة بكبرها بتنتهي يعني الباقي بيكون مثلها ، عيشوا حياتكم بتوقع ان كل شيء ماراح يبقى معك عشان تكثر خياراتك الى جانب مو ان كل شيء بلحظة من حياتك يمكن تفقدها معناته تهمله لا بالعكس عشانه بيختفي عيشة قدر ماتقدر لكن ذي الفلسفة  " خل ببالك كل شيء بتفقدة " تعطيك ميزة تقبل الصدمة والقدرة على التعامل معها لانك توقعت  وتبعدك عن انعدام الخيارات وبالتالي تتدمر نتيجة شيء بسيط فقدته .

                                                                                                                                         انتهى .